2014/10/02

انا كمان مش عارف اديك يا ريس

ازيك يا ريس ،، انت بخير الحمد لله ؟؟ طيب علشان ما اطولش عليك اكيد سفرية امريكا عامله لك صداع وبأختصار ،، "أنا مش قادر اديك " ايوه انا مش قادر اديك يا ريس اللي انت عايزه ،، اكيد بتسأل ليه ؟؟

عشان انا محبط ،، عشان خايف علي مليكة "دي بنتي بالمناسبه"  

انا برضه ما قولتلكش ليه 

1) لاننا بقالنا 4 سنين من غير برلمان ولا حياه تشرعية في مصر 
2) لاننا بقالنا 4 سنين في غلاء اسعار غير متناسب مع الدخول 
3) لاني وبعد 4 سنين شغل في احد القنوات اتقفلت بجره قلم وما اخدناش حقوقنا "قناة الرافدين بالمناسبه"
4) لان فاتوره الكهرباء غالية .. والبنزين غالي .. والمرتب هو الوحيد اللي ما يبعلاش 

لان فرص العمل اللي حضرتك بتعلنها اغلبها بيتم بالوسطة صدقني .. لان سوق العمل عايز سواق وعامل امن مع احترامي للوظائف دي وانا لامؤخذه دارس اعلام وبشتغل في المجتمع المدني 

اه بالمنسبه هو ايه مصير المنظمات اياها دي بتاعت حقوق الانسان ؟؟ "الرساله وصلت ولا لسه ؟" 

عارف يا ريس من الحاجات المضحكه ان الناس اللي كانت عامله ازمة لمرسي -جبهة الانقاذ- وكل شويه يعترضوا وهو مش عارف يأخد قرار بسببهم وماشابها واللي المؤسسة العسكرية كانت بتطلق عليهم رموز المعارضه ونصحت مرسي بالجلوس معاهم ،، حضرتك ما قعدتش معاهم ولا مره لان كلهم اتخرسوا 

انا عندي احباط عشان قولت حلمي هيتحقق بدستور نظيف بس نسيت اني مصيره هيبقي الدرج مش التطبيق ... كان نفسي تكون ياريس بتحترم الدستور وبتطبه زي ما بتطالبني باني احترم اشاره المرور ،، هو صحيح يا ريس انت بتقف في اشاره المرور ؟؟؟

كفايه عليا كده يمكن الكلام ده يكون مصيره 5 سنين يا دوب اخرج الاقي مليكة دخلت الحضانه مش عايز اخرج الاقيها في ثانوي 


ليست هناك تعليقات:

إرسال تعليق

حدث خطأ في هذه الأداة